Жас зерттеушінің Алтынбек Сәрсенбайұлына арналған зерттеу жобасы жүлделі орынға ие болды
Алматы облысы білім басқармасының ұйымдастыруымен 9–10 сынып оқушылары арасында жас тарихшылардың «Менің шағын Отаным» атты республикалық интеллектуалдық конкурсының облыстық кезеңі өтті.
Алматы, NEGE. Биылғы байқау «Жасампаздар: менің өлкемнің тұлғалары мен батырлары» номинациясы бойынша өрбіді.
Бұл додада Алматы облысы, Райымбек ауданы, Сарыжаз ауылындағы орта мектептің 10-сынып оқушысы Бақытжан Береке өз зерттеу жобасымен көзге түсіп, 2-дәрежелі дипломмен марапатталды. Ол «Алты Алаштың алдаспаны (Қазақстанның мемлекет және қоғам қайраткері, дипломат, журналист Алтынбек Сәрсенбайұлы)» атты ғылыми жобасын ұсынды. Жоба жетекшісі – Арайлым Төлепбергенова.
Жас зерттеуші өз жұмысында елдің тәуелсіздігі мен дамуына сүбелі үлес қосқан қайраткердің өмірі мен қызметін терең зерделеп, отансүйгіштік пен азаматтық ұстанымның үлгісін көрсетті.
Байқауда 1-орынды Алатау қаласы, №52 орта мектептің 10-сынып оқушысы Алиев жеңіп алды.
Осындай зияткерлік сайыстар оқушылардың туған жер тарихына деген қызығушылығын арттырып қана қоймай, олардың зерттеу дағдылары мен шығармашылық қабілеттерін дамытуға зор мүмкіндік береді.
