«Жанды жара»: Жетісу әкімі «Қапал-Арасан» жайлы сұраққа жауап берді
Жетісу облысының әкімі Бейбіт Исабаев кезінде аты дүркіреген «Қапал-Арасанның» болашағы жеке кәсіпкердің ниетіне байланысты екенін жасырмады.
Астана, NEGE. Орталық коммуникациялар қызметінде өткен баспасөз жиынында Nege.kz Исабаевтан «Қапал-Арасанды» қайта іске қосу мүмкіндігі қарастырылып жатыр ма?» – деп сұрады. Әкімнің айтуынша, нысанның қазіргі иелері 2027 жылы реконструкция жұмыстарын бастамақ. Алайда ол бұл уәделерге күмәнмен қарайтынын жеткізді.
«Жанды жара. (...) Соңғы рет сөйлескенімізде қазіргі иелері жобалық-сметалық құжаттаманы әзірлеп жатырмыз, 2027 жылға қарай реконструкцияны бастаймыз деді. Бірақ нысан жекеменшікке өтіп кеткен. Уәде беріп отыр, бірақ құрылысқа қатысты сенімім аз», – деді әкім.
Исабаевтың айтуынша, 15–18 жыл бұрын санаторий жеке кәсіпкердің қолына өтті. Ол 2–3 жыл осы іспен айналысты да, кейін басқа компаниялар тобына сатып жіберді. Олар тағы үшінші компанияға сатыпты.
