Жанбыршин өзін әлеуметтік желіде сынағандарды Жаңаөзенге шақырды
Еділ Жаңбыршиннің әлеуметтік желідегі бұралқы иттерге қатысты жазбасы қызу талқыланып жатыр.
Астана, NEGE. Мәжіліс депутаты Еділ Жанбыршин әлеуметтік желіде өзіне сын айтқандарды Жаңаөзен қаласына барып, мәселені бірге талқылауға шақырды.
Ол келесі аптада Маңғыстау облысына баратынын айтып, сын айтушыларға «онлайн айтысудың» орнына жергілікті тұрғындармен жүздесіп, жағдайды көзбен көруді ұсынған.
Депутаттың айтуынша, сапар барысында қаңғыбас иттер мәселесінен зардап шеккен отбасыға бару да жоспарланған. Сонымен қатар, жол шығыны мен тұру ақысын өзі өтейтінін жеткізген.
Депутат өзіне пікір білдірген бірнеше желі қолданушысына осындай ұсыныс тастаған. Оның бұл ұсынысын Дамила Танкибаева атты желі қолданушысы қабыл алғанын мәлімдеді.
Естеріңізге сала кетейік, ҚР Парламенті Мәжілісі қарауындағы жаңа заң жобасында бұралқы жануарларға қатысты бірқатар өзгерістер ұсынылды.
Құжатта жануарлар санын реттеу тетіктерін күшейту және азаматтардың қауіпсіздігін қамтамасыз ету шараларын қайта қарау көзделген. Сонымен қатар, иесіз жануарларды мемлекеттік бюджет есебінен вакцинациялау нормасын алып тастау қарастырылған.
