Жәнібек Әлімханұлы үшінші белбеуден үмітті екенін мәлімдеді
Орта салмақта WBO және IBF тұжырымдары бойынша әлем чемпионы Жәнібек Әлімханұлы әлеуметтік желіде жанкүйерлеріне амбициялық жоспарларын жеткізді, деп хабарлайды Prosports.kz.
Алматы, NEGE. Инстаграм парақшасында ол жанкүйерлерге үндеу жариялап, қысқа да мағыналы жазба қалдырды.
«Үшінші белдікке апарар жолда үлкен жұмыс атқарылып жатыр. Құдай қаласа, тарих жасалады», – деп жазды қазақстандық боксшы.
Бұл мәлімдеме Жәнібектің WBC чемпионы Карлос Адамеспен мүмкін болатын біріккен жекпе-жегі жайлы әңгімелерді қайта жандандырды. Мұндай кездесу Әлімханұлының абсолют чемпион атану жолындағы маңызды қадам болмақ.
Айта кетейік, 5 сәуірде Астанада өткен кездесуде Жәнібек француз Анауэль Нгамиссенгені бесінші раундта нокаутпен жеңіп, чемпиондық белдіктерін сәтті қорғаған еді. Оның кәсіби бокстағы көрсеткіші – 17 жеңіс (12 нокаут), жеңіліс жоқ.
