Жәнібек Әлімханұлы IBF нұсқасы бойынша чемпиондық белбеуінен айырылды
Бұл жөнінде 10 наурызда Қазақстан кәсіби бокс федерациясының президенті Рахымжан Ерденбеков хабарлады.
Астана, NEGE. Оның мәлімдеуінше, Халықаралық бокс федерациясы (IBF) қазақстандық боксшы Жәнібек Әлімханұлын орта салмақтағы әлем чемпионы титулынан айырған.
«Бүгін, тура бір сағат бұрын IBF шешім шығарды. IBF-тің қатаң ережелері бар, олар өз хатында осыған сілтеме жасады.
Олардың хатына сәйкес, Жәнібек Әлімханұлы 2026 жылдың 2 желтоқсанына дейін шеттетілді. Олардың ережелерінде кез келген салмақ дәрежесіндегі чемпион өз белбеуін тоғыз ай бойы қорғауы керек деп көрсетілген, яғни Жәнібек оны 2026 жылдың 4 шілдесіне дейін қорғауы керек.
Қазіргі жағдайға байланысты 2026 жылдың 5 наурызында IBF директорлар кеңесі титулды дереу бос деп жариялау туралы шешім қабылдады», – деп жазды Ерденбеков.
Жәнібектің командасы бұл іс бойынша апелляциялық шағым түсірген.
Еске салсақ, бұған дейін Бүкіләлемдік бокс ұйымы (WBO) Жәнібек Әлімханұлын 2025 жылдың 2 желтоқсанынан бастап жарыстардан бір жылға шеттеткен еді. Оған допинг-тестінің мельдонийге оң нәтиже көрсетуі себеп болды.
