Жәмила Бақбергенова олимпиадалық салмаққа ауыспақ
Норвегияның Осло қаласында өтіп жатқан әлем чемпионатында әйелдер күресінен күміс жүлдегер атанған Жәмила Бақбергенова елге оралды.
Жәмила 72 келі салмақта белдесіп, күміс медаль иегері атанған болатын.
«Жанкүйерлердің қолдауын шын сезіндім. Маған демеу берген жандарға көп рахмет! Әлем чемпионаты мен үшін күміспен аяқталды. Әрине, алтын алсам деген мақсатым болды. Бірақ бұйырғаны күміс екен.
Жапондық Масако Фуруитимен осымен төртінші рет кездесіп, үшеуінде ұтылдым. Оны Иван Ярыгин турнирінде бір рет жеңген екенмін. Ендігі мақсат - олимпиадалық салмаққа ауысу. Содан соң Азия ойындары мен өзге де ірі жарыстарға дайындаламыз», - деді Жәмила.
