Жамбылдық полицейлер ұрланған қаруларды іздестіріп жатыр
Жамбылдық полицейлер ұрланған қаруларды анықтау бойынша жедел-
іздестіру шараларын үздіксіз жүргізіп жатыр.
Тараз, NEGE. Мәселен, тараздық полицейлер зират аумағынан қара түсті полиэтилен пакетін тапты. Нәтижесінде 2 тапанша, 1 тегіс ұңғылы аңшы мылтығы, 17 патрон және бронежилеттің 1 темір қалқаны тәркіленді.
Сондай-ақ, 2022 жылғы 4 тамызда бірлескен іс-қимыл барысында Жамбыл ауданының аумағынан ақ түсті полиэтилен пакетін тапты. Оның ішінен Полиция департаментінен ұрланған 1 автомат, 1 қос ауызды тегіс ұңғылы аңшы мылтығы табылған.
2022 жылғы 8 тамызда облыс орталығы аумағында тас үйіндісінің астынан көк түсті қап табылып, оның ішіндегі 1 тапанша, 1 тегіс ұңғылы аңшы мылтығы тәркіленді.
Сол күні жанармай құю бекетінің жанынан автомат табылды. Тиісті сот-баллистикалық сараптамасы тағайындалды.
2022 жылдың 1 тамызынан бастап барлығы 8 атыс қаруы тәркіленді. Оның ішінде үшеуі – тапанша, екеуі – автомат.
Жамбыл облысының Полиция департаменті қарудың, оқ-дәрілердің, арнайы құралдардың орналасқан жері туралы хабарлаған немесе оларды полицияға өз еркімен тапсырған адам, егер басқа құқық бұзушылықтарға қатысы болмаса, қылмыстық және әкімшілік жауапкершілікке
тартылмайтынын еске салады. Анонимділікке кепілдік беріледі.
