Жамбылдағы сарбаз өлімі: рота командиріне қатысты қылмыстық іс сотқа жолданды
Бас әскери прокуратура Гвардейск гарнизонындағы сарбаз өліміне қатысты қылмыстық істі тергеу аяқталғанын хабарлады.
Астана, NEGE. Бұл іс бойынша әскери бөлімнің рота командирі айыпталуда. Командирдің өз қызметіне салғырт қарауы сарбаз Е.Рүстемұлының қаза болуы себептерінің бірі ретінде қарастырылып отыр.
«Тергеуде лауазымды тұлғаның жеке құрамның қызметін және әскери қызметшілердің қаруды қолдануын бақыламағаны, сонымен қатар қаза болған сарбаздың қызметтестеріне қатысты билік өкілеттігін асыра пайдаланғаны анықталды», – делінген хабарламада.
Дәлелдер жиналып, қылмыстық іс сотқа жолданды.
Бас әскери прокуратура сарбаздың өліміне қатысты басқа да мән-жайларды тергеу іс-шаралары жалғасып жатқанын, тергеу барысы ерекше бақылауда екенін атап өтті.
Еске салсақ, мерзімді әскери қызметші 27 қаңтарда қаруды ұстау кезінде алған жарақат салдарынан қаза болды.