Жамбыл облысында мотокөлік жүргізушілерінің 236 заңбұзушылығы анықталды
Жамбыл облысында үш күндік рейд барысында мотокөлік жүргізушілері тарапынан 236 жол ережесін бұзу дерегі тіркелді, деп хабарлайды полиция департаменті.
АЛМАТЫ, NEGE. Ведомствоның мәліметінше, рейд кезінде мас күйінде көлік басқарудың 5 фактісі анықталды. Сондай-ақ жүргізуші куәлігі немесе қажетті санаты жоқ 57 адам әкімшілік жауапкершілікке тартылды.
— 8 жүргізуші жалған мемлекеттік нөмір қолданған, ал 21 жағдайда мопед пен скутерді тіркеусіз басқару дерегі тіркелді, — делінген полиция хабарламасында.
Құқық бұзушылықтардың алдын алу үшін 99 мотокөлік айыппұл тұрағына қойылған. Полиция қызметкерлері жол ережесін сақтау – жолдағы қауіпсіздіктің негізгі кепілі екенін ескертіп, екі доңғалақты көлік жүргізушілерін заң талаптарын қатаң сақтауға шақырды.