Жамбыл облысында экс-депутаттың партиядан шығарылуына қатысты іс қайта қаралады
Жамбыл облыстық мәслихатының бұрынғы депутаты Дамир Ташқараевтың партиядан шығарылуына қатысты іс қайта қаралатын болды, деп жазады BES.media.
Астана, NEGE. Кассациялық сот алқасы Дамир Ташқараевтың AMANAT партиясымен арадағы дауы бойынша талаптарын ішінара қанағаттандырды. Сот апелляциялық саты қаулысының күшін жойып, істі қайта қарауға жіберді. Осылайша, оның партиядағы мүшелігін қалпына келтіру мәселесі қайта қаралатын болды.
Іс бойынша түпкілікті шешім 21 маусымға дейін қабылдануы тиіс.
Бұған дейін Дамир Ташқараев мәслихат сессиясы кезінде облыс әкімінің сөзін бөлгеннен кейін мандатынан айырылғанын айтып, бұл жағдайды саяси қысым ретінде бағалаған еді.
Ал өңірлік әкімдік пен мәслихат бұл тұжырыммен келіспейтінін мәлімдеді. Әкімдік өкілдерінің айтуынша, сессияның бейнежазбасында ешқандай ашық жанжал көрінбейді, сондай-ақ облыс әкімі Ербол Қарашөкеев пен депутат арасында кикілжің болмаған. Бұған қоса, әкім партияның ішкі ісіне араласпайтынын атап өтті.
Мәслихат та бұл мәселеге саяси астар беруге негіз жоқ екенін алға тартады. Олардың мәліметінше, партиядан шығару – ішкі рәсім, ал депутаттық мандаттан айыру этика мен регламент талаптарының бұзылуына байланысты жүзеге асқан.
