Жамбыл облысында Анабай кен орнынан газдың жаңа көзі ашылды

Алматы, NEGE. QazaqGaz ҰК дерегінше, қажетті жұмыстар жүргізілгеннен кейін өнеркәсіптік газ ағыны алынды. Бұл - ұңғыманың жоғары өнімділігін және оның стратегиялық маңыздылығын растайды.

«Игеру кезінде газ алауы алынды, бұл жоспардың дебиттік көрсеткіштерінің жоғары екендігін көрсетеді. Алау неғұрлым қуатты және жоғары болса, ұңғымадағы газдың шығымы соғұрлым жоғары болады.

Бүгіннен бастап ұңғыма іске қосылды, газ тұрақты алына бастады. №17 ұңғыма Анабайдағы газ өндіру көлемін ұлғайтатын негізгі объектілердің бірі бола алады, бұл өз кезегінде газдың ресурстық базасын ұлғайтуға және өңірдің энергетикалық қауіпсіздігін нығайтуға ықпал етеді», — делінген ақпаратта. 

Анабай кен орнындағы №17 ұңғыманы бұрғылау 2024 жылдың 3 қыркүйегінде басталған. 25 қарашада мамандар 3690 метр тереңдіктен газ шыққанын растады.

QazaqGaz барлық технологиялық процестерді оңтайландырумен және экологиялық стандарттарды ескере отырып, Анабай кен орнын тиімді игеру бойынша қойылған мақсаттарды іске асыруды жалғастыруда. Алынған нәтижелер геологиялық барлауға инвестиция құюдың бекер еместігін растайды, бұл газдың тұрақты жеткізілуі мен газдың ресурстық базасын кеңейтуді қамтамасыз етеді.

Ал QazaqGaz 24 желтоқсаннан бастап №18 жаңа ұңғыманы бұрғылауды бастады.

Бұған дейін «QazaqGaz» ҰК» АҚ басқарма төрағасы Президентке есеп берген болатын.