Жамбыл облысында 22 спортшы бала ауруханаға түсті
21 қаңтар түнгі уақытта Меркі аудандық көпбейінді орталық ауруханасына 12–17 жас аралығындағы 22 кәмелетке толмаған жасөспірім жеткізілген.
Астана, NEGE. Қызылорда облысынан ауданға күрестен оқу-жаттығу жиынына келген жас спортшылар «Тұран» демалыс орнында болған.
Алдын ала диагноз – этиологиясы анықталмаған гастроэнтерит.
«Ауруханаға жүгінген науқастардың жағдайы жеңіл дәрежеде, денсаулықтары қалыпты, дәрігерлердің тұрақты бақылауында», – делінген әкімдік таратқан хабарламада.
Сондай-ақ ведомство өкілдері бұл жағдай бойынша облыстық санитариялық-эпидемиологиялық бақылау департаменті тиісті тексеру жұмыстарын жүргізіп жатқанын хабарлады. Аурудың себептерін анықтау мақсатында науқастардан және тағам өнімдерінен зертханалық сараптамалар алынған, қазіргі таңда қорытындысы күтілуде.
Бұл факт Меркі аудандық полиция бөлімінде тіркелген, құзырлы органның тексеру қорытындысы негізінде тиісті процестік шешім қабылданбақ.
Облыс әкімі Ербол Қарашөкеевтің тапсырмасымен жедел штаб құрылған.
Демалыс орнында барлығы 103 жас спортшы мен 13 жаттықтырушы орналастырылған. Демалыс орнындағы басқа балаларға медициналық тексеру жүргізілген, алайда олардан ауру белгілері анықталмаған.
