«Жалақы төмен, талап көп»: Астанадағы Maxi Шай қызметкерлері шағымданды
Елордадағы «Макси Шай» компаниясында еңбек жағдайына қатысты мәселе ушығып тұр. Жеткізу қызметінде жұмыс істейтін курьерлер жалақының төмендігі мен жұмыс көлемінің көптігіне наразылық білдіріп, басшылықтан жағдайды қайта қарауды сұрады.
Астана, NEGE. Қызметкерлердің айтуынша, дәл осы жеткізу саласындағы жұмыс көлемі басқа ұқсас компаниялармен салыстырғанда әлдеқайда ауыр болғанымен, еңбекақы төмен.
Олардың сөзінше, басшылыққа бірнеше рет жалақыны көтеру және еңбек жағдайын жақсарту жөнінде өтініш айтылған. Алайда, талап-тілектер ескерусіз қалған.
Курьерлердің мәлімдеуінше, компания басшылығы оларға «не жұмыс істеңдер, не жұмыстан кетіңдер» деген талап қойған. Сонымен қатар, жұмыстан шығатын қызметкерлерге қысым көрсетіліп жатқанын жеткізді. Айтуларынша, жұмыстан кеткен жағдайда «еңбек бабы бойынша жұмыстан шығарамыз» деген ескерту жасалып, жалақының негізгі бөлігін құрайтын бонустық төлемдерді бермеу қаупі де айтылған.
Қызметкерлер бұл мәселеге назар аударуды сұрайды. Олар әділ еңбекақы төлеуді, еңбек жағдайын жақсартуды және қызметкерлер құқығының сақталуын талап етеді.
