Жақсылық Омарға шыққан үкімнен кейін ШҚО әкімі отставкаға өтініш берген

Астана, NEGE. Бұл жөнінде ШҚО әкімінің баспасөз хатшысы Лаура Жақыпова хабарлады.

«Қолданыстағы заңнамаға сәйкес, Шығыс Қазақстан облысының әкімі Нұрымбет Сақтағанов белгіленген тәртіппен отставкаға кету туралы өтініш берді. Өтінішті қарау қорытындысы бойынша және оның бұл іске қатысы жоқ екені ескеріліп, отставканы қабылдамау туралы шешім қабылданды. Өңір әкімінің облыстың әлеуметтік-экономикалық дамуының барлық бағыты бойынша қызметі штаттық режимде жалғасуда», – деп мәлімдеді ол әкімге қатысты жазбадағы пікірде.

Еске салсақ, Жақсылық Омарға қатысты қылмыстық іс бойынша сот процесі 19 наурызда басталған болатын. Ол Қылмыстық кодекстің екі бабы – аса ірі мөлшерде алаяқтық және аса ірі мөлшерде пара алу бойынша қылмыстық құқықбұзушылықтар жасады деп айыпталды. Экс-әкім сотта кінәсін толық мойындады.

3 сәуірде Өскемен қаласының қылмыстық істер жөніндегі мамандандырылған ауданаралық соты оны аталған баптар бойынша кінәлі деп танып, оған 6 жылға бас бостандығынан айыру жазасын тағайындады. 20 мамырда үкім заңды күшіне енді.

Заңға сәйкес, егер саяси мемлекеттік қызметшінің тікелей бағынысындағы қызметкер сыбайлас жемқорлық қылмысын жасап, оған қатысты айыптау үкімі заңды күшіне енсе, мұндай саяси мемлекеттік қызметші отставкаға кету туралы өтініш беруге міндетті. Ал мұндай отставканы қабылдау немесе қабылдамау жөніндегі түпкілікті шешімді жоғары тұрған басшылық қабылдайды.