«Жағдай мәз емес»: Бектенов «Самұрық-Энерго» басшысына қатаң ескерту жасады
Үкімет отырысында премьер-министр Олжас Бектенов Алматыдағы үшінші жылу электр орталығының (ЖЭО-3) құрылысының баяу жүріп жатқанына байланысты «Самұрық-Энерго» АҚ Басқарма төрағасы Қайрат Мақсұтовты қатаң сынға алды.
Астана, NEGE. Бүгін Үкіметте 2026 жылдың бірінші жартыжылдығындағы әлеуметтік-экономикалық даму қорытындылары мен республикалық бюджеттің атқарылу барысы қаралды.
Отырыс барысында Олжас Бектенов «Самұрық-Энерго» басшысын қатаң сынға алды. Ол өткен аптада энергетика министрі Алматыдағы екінші және үшінші ЖЭО-лардың құрылыс барысын тексеріп қайтқанын айтып, үшінші жылу электр орталығындағы жұмыстардың қарқынына көңілі толмайтынын жеткізді.
«Өткен аптада энергетика министрі Алматыға барып, екінші және үшінші ЖЭО-ны тексеріп келді. Үшінші ЖЭО бойынша жағдай мәз емес, жұмыс қарқыны өте төмен. Егер жылдың аяғына дейін бітірмесеңіздер, сіздің жеке жауапкершілігіңіз қатаң қаралатын болады. Күнделікті бақылауға алыңыз. Бұндай жағдайды доғару керек», – деп ескертті Олжас Бектенов Қайрат Мақсұтовқа.
Премьер-министр Энергетика министрлігі мен «Самұрық-Қазына» қорына Алматыдағы энергетикалық нысандардың, сондай-ақ Түркістан облысындағы бу-газ қондырғысы жобасының белгіленген мерзімде аяқталуын қамтамасыз етуді тапсырды. Оның айтуынша, стратегиялық маңызы бар энергетикалық жобалардың кешігуіне жол берілмеуі тиіс.
