Зарина Дияс Чарльстон турнирін жеңіспен бастады

Алматы, NEGE. Әлемнің 88-ракеткасы З.Дияс алғашқы айналымда іріктеу сайысы жеңімпаздарының бірі, дүниежүзілік рейтингіде 151-орында тұрған ресейлік Наталья Вихлянцевамен кездесті. Бірінші партия барысында Зарина өз шеберлігінің басым екендігін таныта білді – 6:3. Қазақстандық теннисші екінші сетті брейкпен бастады – 2:0. Тағы бір брейк – 4:0. Ақыры үшінші матчболын сәтті пайдалана алды – 6:1. Бәсеке 1 сағат 14 минутқа созылды. З.Дияс екінші айналымда отандасы, әлемнің 31-інші, осы доданың 11-ракеткасы Юлия Путинцева немесе рейтингіде 104-сатыдағы германиялық Андреа Петковичтің біреуімен шеберлік байқасады. Қазақстан әйелдер құрамасының капитаны Ярослава Шведова екінші айналымға шыға алмады. Ол әлемнің 77-ракеткасы, жапониялық Мисаки Доиден 3:6, 3:6 есебімен ұтылып қалды. Еске сала кетейік, бұдан бұрын қазақстандық теннисшілердің Чарльстон турниріндегі қарсыластары анықталғанын, А.Бубликтің ATP чемпиондық кестесінде үздік ондыққа кіргенін жазған болатынбыз.