Волейболдан Ұлттар кубогы: Қазақстан әйелдер құрамасы екінші жеңісіне жетті
Вьетнам астанасы Ханойда өтіп жатқан волейболдан әйелдер командалары арасындағы AVC құрлықтық Ұлттар кубогында Қазақстан құрамасы екінші жеңісіне қол жеткізді.
АЛМАТЫ, NEGE. Бұл жолы Ришат Гилязутдинов жаттықтыратын команда Моңғолия құрамасымен кездесіп, 3:1 есебімен басым түсті. Бірінші партияда қазақстандықтар айқын басымдық танытып, 25:14 есебімен жеңіске жетті. Алайда екінші сетте қарсылас күтпеген қарсылық көрсетіп, 24:26 есебімен жеңіске жетті. Үшінші партияда отандық волейболшылар қарымта қайтарып, 25:18 нәтижесімен басым болды.
Төртінші сетте Моңғолия 9:4 есебімен алға шыққанымен, қазақстандықтар есепті теңестіріп, кейін матчты өз пайдасына аяқтады – 25:15. Жалпы есеп – 3:1.
Ойын барысында команда капитаны, Орал волейболының түлегі Сана Анарқұлова жоғары деңгейде ойын көрсетті. Сондай-ақ Юлия Якимова, Маргарита Бельченко, Перизат Нұрбергенова, байланыстырушы Наиля Нигматуллина, Сәния Балағазинова мен Татьяна Никитинаның үлесі зор болды. Либеро позициясында Сәбира Бекішева мен Томирис Сағымбаева алма-кезек ойнады.
Қатарынан екі жеңіске жеткен Қазақстан құрамасы В тобының көшбасшысы атанды. Ертең ұлттық құрамамыз Индонезия командасына қарсы алаңға шығады.
