Спорт
Юсуп Батырмұрзаев күрес түрлерінен Олимпиадаға жолдама алды
Алматыда өтіп жатқан күрес түрлерінен Азия аймақтық іріктеу турнирінде қазақстандық еркін күрес шебері Юсуп Батырмұрзаев Олимпиадаға жолдама жеңіп алды, деп хабарлайды ҚазАқпарат Olympic.kz.
Алматы, NEGE. 125 келіде белдесетін Юсуп жартылай финалда үндістандық балуан Самит Самиттен 2:0 есебімен басым түсті. Осылайша, іріктеу турнирінің финалына шығып қана қоймай, Токио Олимпиадасына жолдама еншіледі.
Айта кетейік, бұл – қазақстандық еркін күрес шеберлерінің бесінші жолдамасы. Бұған дейінгі (төрт салмақ бойынша) жолдамаларды Әсет Серікбаев шәкірттері Нұр-Сұлтандағы әлем чемпионатында иеленген болатын. Өкінішке қарай, 86 келідегі Азамат Дәулетбеков өзбек балуанына есе жіберіп, лицензиясыз қалды.
Юсуп Батырмұрзаев 1996 жылдың 13 сәуірінде дүниеге келген. Ақтөбе облысының намысын қорғайды, 2020 жылғы Азия чемпионатында топ жарған. Қазақстан командасының қоржынындағы лицензиялардың жалпы саны 48-ге жеткенін еске саламыз. Күрес түрлеріндегі лицензиялар жеке балуанға емес, тұтас командаға беріледі.