«Ұшты, ұшты... Тоғызқұмалақ ұшты!» – Ойын тақтасын ғарышқа ұшырудың құны қанша?
Әдетте бір нәрсеге таң қалғанда «Айды аспанға шығарды» деп жататын еді, бұл жолы Туризм және спорт министрлігі тоғызқұмалақ тақтасын ғарышқа шығарып жіберіпті...
Бұл министрліктің Дүниежүзілік көшпенділер ойынына байланысты жаңалығы болса керек, сірә. Министрлік өкілдерінің айтуынша, олар Ресейдің ғарыш агенттігімен келісіп, тақтаны ғарышқа беріп жіберген.
«Тақта 9 қыркүйек күні ғарышқа ұшып кеткен, миссиясы аяқталған соң жерге қайта оралды. Бұл ерекше оқиға, өйткені тоғызқұмалақ – ғарышта болып келген тұңғыш ұлттық ойынымыз», – депті министрлік.
Ербол Мырзабосынов биыл 2 қыркүйекта Туризм және спорт министрі болып тағайындалды. Бұған дейін ол Спорт және дене шынықтыру комитетінің төрағасы болған. Тоғызқұмалақты ғарышқа ұшырып жіберу идеясы кімдікі екенін министрліктегілер айтпады. Бұл идея экс-министр Е.Маржықбаевтікі ме, әлде Е.Мырзабосыновтікі ме?
Айтпақшы, тоғызқұмалақ тақтасын ғарышқа ұшыру үшін Туризм және спорт министрлігі қанша ақша төледі? Әр заттың салмағы есептеулі ғарыш кемесіне ресейлік ғарышкерлер тоғызқұмалақ тақтасын ермек үшін алмағаны белгілі ғой. Біз бұл сұраққа жауап алу үшін министр Е.Мырзабосыновтың атына ресми сауал жолдаймыз.
Дүниежүзілік көшпенділер ойынында тоғызқұмалақ додасына 41 елден 114 спортшы қатысып жатыр. Бұлардың арасында Колумбия, Бангладеш, ұлыбритания, Франция, Германия, АҚШ, Қытай, Лавия, Африка және кейбір араб елдері бар.
