«Үш қоңыр» тыңдарманды есті әнмен сусындатты
«Алатау» дәстүрлі өнер театрында «Үш қоңыр» тобының «Ұлы елім» атты шығармашылық кеші өтті.
Аталмыш трио алғаш Қаскелең аудандық мәдениет үйінің ән-күй ансамблінің әншілерінен құралған. Айсәуле Қайырғазина, Нариман Әбдрахманов, Ерғали Ағайдаров өнер ұжымының негізін қалаған қарлығаштар. Топтың негізгі ұстанымы – халық әндерінің қаймағын бұзбай, тығдарманға нақышында жеткізу.
«Үш қоңырдың» репертуары да ауқымды. Ғасырлардан тамыр тартқан халық әндері мен халық композиторлары Ақан сері, Біржан сал, Мұхит, Үкілі Ыбрай сынды дәстүрлі ән өнерінің негізін қалаған Арқа, Жетісу, Батыс мектебінің туындыларын қамтиды.
Кеште өнерпаздар ХХ ғасырдың екінші жартысында қазақ ән өнерін жаңаша түрлендірген ақын-сазгерлердің туындыларын да орындады. Атап айтар болсақ, Нұрғиса Тілендиев, Теміржан Базарбаев, Шәмші Қалдаяқов, Әсет Бейсеуов, Мансұр Сағатов сынды теңдесіз композиторлардың шығармалары жиылған жұрттың құлақ құрышын қандырды.
Шәкірттерін құттықтап келген Қазақстанның Халық әртісі Рамазан Стамғазы, Қазақстанның еңбек сіңірген қайраткерлері Еркін Шүкіман мен Айгүл Қосановалар жүрекжарды тілектерін айтып қана қоймай, әннен шашу шашты.
Ардақ Оразғалиұлы
