Уран кенін кім ұрлаған?
Солтүстік Қазақстанда күзеттің жоқтығынан уран кені тоналған деп мәлімдеді аймақтағы экология департаменті.
Алматы, NEGE. «Уран кенінде күзет болмағанын пайдаланып, кендегі қауіпті аймақтарды қоршап тұратын темір шарбақтарды жұлып әкеткен. Ғимараттағы құрылыс материалдары мен түрлі-түсті металлдар да ұрланған», – делінген хабарламада.
Департамент мәліметінше, Айыртау мен Мүсірпеов аудандарында алты уран кені бар. Ондағы жұмыстың бәрі тоқтатылған, бірақ билік қауіпсіздік шараларын қолданбай отыр.
2018 жылы облыс әкімдігі 2019-2020 жылдары қоршауды қалпына келтіру жұмысын жүргіземіз деп шешім қабылдаған. Бірақ мұның тек жартысы ғана орындалған. Аталған екі ауданның билігі кен айналасын қоршауға қаржы бөлу жөнінде өтініш түсірмеген.
Pszsk.info сайтының жазуынша, 2 қыркүйекте сотқа Айыртау ауданындағы кенді қараусыз деп тану жөнінде өтініш түскен. Осыдан кейін жергілікті билік кен айналасын қайта қоршауы мүмкін. Бүгінде бұл аймаққа кез келген адам бара береді.
Басылымның жазуынша, бұл аймақтағы радиация қалыпты көрсеткіштен аспайды.
