ҰОС-да қаза тапқан үш қазақстандық сарбаздың сүйегі Мәскеуден елге жеткізіледі
Мәскеуде Ұлы Отан соғыс майданында табылған үш қазақстандық сарбаздың сүйегін отанына «Атамның аманаты» атты қоғамдық бірлестік жеткізетін болды, деп хабарлайды «Хабар 24».
Алматы, NEGE. Жауынгерлердің сүйегін Ресей іздестіру қозғалысы тапқан. 2019 жылдан бері бұл ұйым Екінші дүниежүзілік соғыс кезінде қаза болған және із-түзсіз жоғалып кеткен қазақстандық сарбаздарды іздестіріп келеді. Сол кезде бір жарым миллион қазақстандық майданға аттанып, 600 мыңы қаза тапқан болатын. 271 мыңы хабарсыз кеткен. «Атамның аманаты» бірлестігіне туыстары жөнінде хабарды білгісі келген 5 мыңдай өтініш түсті. Қазір 1130-ы жөнінде мәлімет табылды. Қазақстан қорғаныс министрлігінің қолдауымен соңғы үш жылда Ресей мен Украинадан 8 сарбаздың сүйегі елімізге жеткізілді.