Үндістандағы ұшақ апатынан 110 адам қаза тапты
Air India әуе компаниясы өздеріне тиесілі ұшақтың Үндістанның батысында апатқа ұшырағанын растады. Boeing 787-8 ұшағы Лондонға бағыт алған, бортта 242 жолаушы болған. Жергілікті TimesNow порталының дерегінше, 110 адам қаза тапқан.
Алматы, NEGE. «110 адамның қаза тапқаны расталды», – делінген хабарламада.
Air India әуе компаниясы X әлеуметтік желісіндегі мәлімдемесінде ұшақтың әуеге көтерілгеннен кейін апатқа ұшырағанын хабарлады. Ұшақ Үндістанның Ахмедабад қаласынан Лондондағы Гэтвик әуежайына бағыт алған.
Рейсте 169 Үндістан азаматы, 53 Ұлыбритания азаматы, бір канадалық және жеті Португалия азаматы болған. Air India компаниясы жарақат алғандар жақын маңдағы ауруханаларға жеткізіліп жатқанын айтты, бірақ олардың нақты саны жарияланған жоқ. Әуе апатынан кейін Ахмедабад халықаралық әуежайының жұмысы уақытша тоқтатылды.
Бортта Қазақстан азаматтары жоқ.
Қайғылы оқиғаның нақты себебі әлі анықталған жоқ. Ұшақ әуежай аумағынан тыс жерге құлаған. Оқиға орнына жедел жәрдем мен өрт сөндірушілерден бөлек, шекаралық қауіпсіздік күштері мен ұлттық гвардия да келген.
