Ұлттық ұланның 3 офицері полигонда жарақат алды
Жамбыл облысындағы полигонда Ұлттық ұланның үш офицері жарақат алды. Ақпаратты Ұлттық ұланның баспасөз қызметі растады, деп хабарлайды ҚазАқпарат.
Тараз, NEGE. «25 қыркүйекте жауынгерлік дайындық жоспарына сәйкес «Айша-Бибі» оқу полигонында Ұлттық ұланның әскери бөлімінің әскери қызметшілері оқу-жаттығу өткізді. Қауіпсіздік шараларын бұзу салдарынан 3 офицер аяғынан жеңіл жарақат алды», – делінген хабарламада.
Әскери қызметшілер Тараз қаласының емдеу мекемесіне жатқызылды. Олардың жағдайы қанағаттанарлық, өмірлік маңызды органдарына залал келмеген. Болған оқиғаның мән-жайы анықталып жатыр.
Айта кетейік, бүгін тағы бір төтенше оқиға орын алды. Қарағанды облысының Балапан алаңында оқу-жаттығу жасап жүрген ұшақ апатқа ұшырады.Әуе кемесі сағат 08.44-те Доскей ауылынан 5 км жерде құлады. Іздестіру жұмыстары барысында қираған ұшақ пен екі адамның денесі табылды.