Ұлттық қордан 850 млрд теңге алынбақ
Биыл «Nur Otan» партиясының сайлауалды тұғырнамасындағы міндеттемелерді және Президент тапсырмаларын жүзеге асыру үшін Ұлттық қордан қосымша 850 млрд теңге алынады. Бұл туралы Премьер-министрдің орынбасары Әлихан Смаилов айтты, деп хабарлайды inbusiness.kz.
Алматы, NEGE. «Биыл бюджетті нақтылау шеңберінде Ұлттық қордан 850 млрд теңге трансферт тартып, бюджет тапшылығын ЖІӨ-ге 3,5%-ға дейін ұлғайтамыз. Бұл «Nur Otan» партиясының сайлауалды тұғырнамасы аясындағы міндеттемелерді және Мемлекет басшысының тапсырмаларын қаржыландыру үшін керек», - деді Әлихан Смаилов сенаттың жалпы отырысында.
Оның айтуынша, алдағы уақытта Ұлттық қордан түсетін трансферт көлемі 2 есе қысқарады: 4,5 трлн теңгеден 2,4 трлн (2025 жылы) теңгеге дейін. Айта кетейік, осыған дейін Ұлттық қордан алынатын нысаналы трансферт биыл 1 трлн теңгеден 1,8 трлн теңгеге дейін ұлғайтылған еді.
