Ұлттық банк базалық мөлшерлемені 16,25%-ға дейін төмендетті
Ұлттық банктің Ақша-кредит саясаты комитеті базалық мөлшерлемені +/- 1 п.т. дәлізімен жылдық 16,25% деңгейінде белгілеу туралы шешім қабылдады.
Астана, NEGE. Базалық мөлшерлемені төмендету туралы шешім макроэкономикалық көрсеткіштер мен инфляция қарқынының баяулауы аясында қабылданды: жылдық инфляция биылғы тамызда 9,8% болды.
Ұлттық банк инфляцияның 2026 жылға арналған болжамын өзгертпеген: 9-11% аралығында болады деп күтіліп отыр. Алайда 2027 жылға жасалған болжам нашарлаған. Бұған дейін келер жылы инфляция 5,5-7,5% аралығында болады деп болжанған еді, соңғы болжамда бұл көрсеткіш 6,5-8,5%-ға дейін көтерілген.
«Бұл сыртқы инфляцияның өсуіне, реттелетін бағалар алғышартының қайта қаралуына, сондай-ақ фискалдық серпіннің ұлғаюына негізделген. Бұл ретте ақша-кредит саясатының ұзақ уақыт бойы қатаң сақталуы инфляциялық қысымды шектей түсіп, бағаның баяу өсуіне ықпал етеді», – делінген Ұлттық банк хабарламасында.
Банк өкілдерінің болжамынша, 2028 жылы инфляция сыртқы инфляциялық жағдайдың қалыпқа келуіне, фискалдық шоғырлануға, ішкі сұраныстың орнығуына және бірқалыпты қатаң ақша-кредит шарттары аясында инфляциялық күтулердің бәсеңдеуіне байланысты 5%-дық нысанаға жақын тұрақталады.
Ұлттық банктің базалық мөлшерлеме бойынша кезекті жоспарлы шешімі 23 қазанда Астана уақытымен сағат 12:00-де жарияланады.