Ұлытау облысында жаңа полигон мен қалдықтарды қайта өңдеу цехы салынады
Ұлытау облысында қағаз, пластик және резеңке өңдеу цехын және қатты тұрмыстық қалдықтар полигонын салу жоспарлануда. Бұл туралы Үкімет отырысында облыс әкімі Дастан Рысбеков мәлімдеді.
Астана, NEGE. Оның айтуынша, жалпы құны 840 млн теңге болатын жобаны жеке инвестор жүзеге асыруға ниетті. Ол өз қаражатынан 134 млн теңге бөледі және Өнеркәсіпті дамыту қоры мақұлдаған лизингтік қаржыландыру шеңберінде 705 млн теңге тартады.
Қазіргі уақытта жобаны іске асыру үшін облыс басшылығы ауданы 16 га жер телімін бөлді. Сондай-ақ суды пайдалануға және электрмен жабдықтауға арналған техникалық шарттар берілді.
Жаңа кешен жылына 50 мың тоннаға дейін қалдықтарды қайта өңдеп, кәдеге жарата алады деп болжанды. Бұл өңірдегі экологиялық жағдайды едәуір жақсартады.