Ұлытау облысында марганец кені заңсыз өндіріліп, шетелге сатылған
Бас прокуратура Ұлытау облысында 4,8 млрд теңгеге марганец кенін заңсыз өндіру схемасы әшкереленіп, 50 жастағы айыпталушыға сот үкімі шыққанын хабарлады.
Астана, NEGE. Прокуратура мәліметінше, Қостанай облысының 50 жастағы тұрғыны 2020–2023 жылдар аралығында жер қойнауын пайдалануға лицензиясы мен келісімшарты болмағанына қарамастан «Шығыс Қаражал» кен орнында марганец кенін заңсыз өндіруді ұйымдастырған.
«Ол қолма-қол ақшаға айналдыру және жалған мәмілелер жасасу арқылы пайдалы қазбаларды сатудан түскен қылмыстық жолмен табылған ақшалай қаражатты заңдастырған.
Осы кезеңде 16 мың тоннадан астам кен жөнелтіліп, мемлекетке 1,3 млрд теңгеден астам залал келтірілген», – делінген хабарламада.
Айыпталушы өңделген темір-марганец кенін ел ішінде және шетелге сату арқылы 3,5 млрд теңгеден астам пайда тапқан.
Ұлытау облысы сотының үкімімен кінәлі адам 5 жыл 4 ай мерзімге бас бостандығынан және жер қойнауын пайдалану саласындағы қызметпен айналысу құқығынан 5 жыл мерзімге айырылды.
«Мемлекет кірісіне 4,8 млрд теңге өндіріліп, сондай-ақ қылмыстық жолмен табылған қаражатқа сатып алынған 3 жеңіл және 2 жүк автокөлігі тәркіленді», – деп хабарлады Бас прокуратура.
Сот үкімі заңды күшіне енді.
