Ұлыбритания АҚШ-тың Ирандағы ядролық нысандарға жасаған соққыларын қолдады
Ұлыбритания премьер-министрі Кир Стармер АҚШ-тың Ирандағы ядролық инфрақұрылымға қарсы әскери әрекеттерін қолдайтынын мәлімдеді. Ол Иранның ядролық бағдарламасы жаһандық қауіпсіздікке төнетін елеулі қатер екенін атап өтті.
АЛМАТЫ, NEGE. Стармер өзінің «X» әлеуметтік желісіндегі жазбасында Иранның ядролық қару жасауына жол беруге болмайтынын, ал АҚШ-тың әрекеті бұл қатердің алдын алуға бағытталғанын атап өтті.
«Иранның ядролық бағдарламасы – халықаралық қауіпсіздікке үлкен қауіп. Иран ешқашан ядролық қару жасауға мүмкіндік алмауы тиіс. АҚШ бұл қатерді жою үшін тиісті шаралар қабылдады», – деп жазды Ұлыбритания үкіметінің басшысы.
Кир Стармер Таяу Шығыстағы ахуалдың тұрақсыз екенін айтып, Иран билігін дипломатиялық келіссөздерге қайта оралуға үндеді.
«Аймақтағы жағдай әлі де тұрақсыз. Бұл тұрақсыздықты тоқтату – басты басымдық. Біз Иранды келіссөздер үстеліне оралып, дағдарысты бейбіт жолмен шешуге шақырамыз», – деді премьер-министр.
The Telegraph басылымының хабарлауынша, Ұлыбритания АҚШ-тың әуе шабуылдарына тікелей қатыспаған, алайда Кир Стармер операцияның басталар алдында бұл жоспар туралы алдын ала хабардар болған.
Дайындаған Бердібек Рауан
