Украинаның бас прокуратурасы Айдос Садықовтың өліміне қатысты қылмыстық істі қайта саралайды

Алматы, NEGE. Журналист Айдос Садықовтың өліміне байланысты Украинаның құқық қорғау органдары бапты тапсырыспен жасалған кісі өлтіру санатына ауыстырады. Бұған дейін оларға адам өлтіруге оқталған деген айып тағылған.

«Құқық қорғау органдары қылмысқа қатысы бар делінген күдіктілерге тағылған айыпты «Адам өлтіруге оқталудан» «Адамдар тобының тапсырысымен және алдын ала сөз байласуымен жасалған қасақана кісі өлтіруге» (Украинаның Қылмыстық кодексі 115-бабының 11, 12, 2-бөлігі) өзгерту туралы хабарлама әзірлеп жатыр», - делінген хабарламада. 

Сотқа дейінгі тергеуді Киев қалалық прокуратурасының процессуалдық басшылығымен Киевтегі Ұлттық полицияның бас басқармасы жүргізіп жатыр.

Украина заңнамасына сәйкес, егер қылмыс дәлелденсе, қылмыскерлер он жылдан он бес жылға дейін бас бостандығынан айырылуы немесе мүлкі тәркіленіп, өмір бойына бас бостандығынан айырылуы мүмкін.