Украина қауіпсіздік кеңесінің хатшысы мәлімдеме жасады
Алексей Данилов Украинаға тағы да қару-жарақ жөнелтуге шақырды.
Алматы, NEGE. Украина Ұлттық қауіпсіздік және қорғаныс кеңесінің хатшысы Алексей Данилов Киев қазір Ресеймен табан тірескен күрес жүргізіп жатқанын мәлімдеді. Бұл туралы РИА Новости жазды.
"Қазір біз табан тірескен шайқас (екі жақ шабуыл, бекініс шебін қорғап аңдысу) жүргізіп жатырмыз. Бұл кезде бірде-бір тарап артықшылықты пайдалана алмайды. Бұл бізге артықшылық беретініне сенімдіміз", - деді ол Жапонияның NHK телеарнасына берген сұхбатында.
Сонымен қатар Данилов Украинаға тағы да қару-жарақ жөнелтуге шақырды.
"Бізге қару-жарақ, қару-жарақ және тағы да қару-жарақ қажет. Егер кешіксе, сәйкесінше, жеңіске жету жолында белгілі бір кідіріс болады", - деді ол.
Бұған дейін Украина армиясының бас қолбасшысы Валерий Залужный Economist журналына берген сұхбатында қақтығыстың тығырыққа тірелгенін айтып, "қорғаныс шебін тереңдете бұзу жоспары орындала қоймайтынын" мойындаған. Кейін Владимир Зеленский "бұл тығырыққа тірелу емес" деп мәлімдеді.
