Украина Қазақстан білдірген наразылыққа жауап берді

Астана, NEGE. Министрліктің айтуынша, украин тараптың әрекеті Қазақстанға немесе басқа үшінші тараптарға қарсы бағытталмағанын, бәрі Ресейдің кең ауқымды агрессиясын тойтаруға жұмылдырылған.

«Мұқият жоспарланған және стратегиялық негізделген қорғаныс операциялары барысында Украина Қорғаныс күштері агрессордың әскери өнеркәсіптік әлеуетін жүйелі түрде әлсіретіп, қылмыстық соғыс жүргізуге қажетті мүмкіндіктерінен айырады. Украина агрессордың соққылары мен шабуылдарына жауап береді.

Қара теңіз аймағында және оның шегінен тыс қауіпсіздікке төнген қатерлер мен тұрақсыздықтың жалғыз себебі Ресей агрессиясы болып отыр.

Қазіргі алаңдаушылық аясында Қазақстан тарапынан Украина азаматтарына, тұрғын үйлерге, азаматтық инфрақұрылымға және энергетикалық жүйеге, соның ішінде украин атом электр станцияларының қосалқы станцияларына Ресей жасаған соққыларды айыптаған бұрынғы мәлімдемелердің болмағанына назар аударамыз.

Бар болғаны екі күн бұрын Ресей Украинаға тоғыз сағатқа созылған аралас ракета және дрон соққысын жасады. Соның салдарынан бейбіт тұрғындар қаза тауып, жараланды, Киевтің кемінде 500 мың тұрғыны және Киев облысының 100 мыңнан астам тұрғыны жарықсыз қалды.

Барлық тарапты агрессорды біздің мемлекетке және халқымызға қарсы қылмыстық соғысты тезірек тоқтатуға мәжбүрлеуге күш салуға шақырамыз.

Қорытындысында біз қазақ халқына деген өзгермейтін құрметімізді және халықтарымыздың тарихи берік байланыстарына сай Қазақстан Республикасымен достық әрі прагматикалық қатынастарды дамытуға дайын екенімізді растаймыз», – делінген хабарламада.

​2025 жылдың 29 қарашасында Каспий құбыр консорциумы теңіз терминалының акваториясында жүргізілген шабуыл салдарынан КҚК-ның ВПУ-2 айлақ құрылғысы қатты зақымданды. Новороссийск теңіз портының капитаны енгізген нұсқаулыққа сәйкес, барлық тиеу жұмыстары мен өзге де операциялар тоқтатылған, танкерлер терминал акваториясынан шығарылды.

ҚР Сыртқы істер министрлігінің ресми өкілі Айбек Смадияров КҚК-ның инфрақұрылымына жасалған шабуылды «Қазақстан мен Украинаның екіжақты қатынастарына залал келтіретін әрекет» деп бағалап, украин тарапынан мұндай жағдайдың қайталанбауы үшін нақты шаралар қабылдануын күтетінін мәлімдеген болатын.