Үкіметте СҚО тәжірибесі негізінде жаңа тауарлы-сүт фермаларын салу мәселесі қаралды
Вице-премьер Серік Жұманғариннің төрағалығымен өткен Үкіметтегі кеңесте өңірлердегі жоба бойынша салынып жатқан тауарлы-сүт фермаларының құрылыс барысы тексерілді
Астана, NEGE. СҚО-ның тауарлы-сүт фермалары құрылысына жеңілдікпен несие беру немесе Үлкен жоба бойынша оң тәжірибені тарату 2023 жылы басталды. 100 млрд теңгенің бірінші траншына жылдық 2,5%-бен 2024 жылы 65 ТСФ салынуы тиіс. Ең көп жаңа кәсіпорын СҚО-да салынуда, онда 17 жоба іске асырылып жатыр.
Жинақталған тәжірибені ескере отырып, мұнда Үлкен жоба бойынша 17 млрд теңге көлеміндегі қаражат негізінен мал сатып алуға және жаңа ТСФ-ның құрылыс-монтаждау жұмыстарына берілді. Бұл ретте жалпы сомасы 54,5 млрд теңгені құрайтын жаңа 17 ТСФ құрылысына қажетті қалған инвестицияны кәсіпкерлер салды. 12 жоба Алматы, 7 – Ақмола, 6 – Павлодар және Шығыс Қазақстан, 5 – Қостанай, 4 – Батыс Қазақстан, 3 – Жетісу, 2 – Түркістан және Абай облыстарында, 1 жоба – Ақтөбе облысында жүзеге асырылып жатыр.
Жиында ауыл шаруашылығы вице-министрі Ермек Кенжеханұлы атап өткендей, қазіргі уақытта жалпы құны 100 млрд теңге болатын 2023 жылғы транштың игерілуі 94,4%-ды құрайды. Қазірдің өзінде 20 ТСФ салынып, пайдалануға берілді, 24 жоба бойынша жұмыстар аяқталуда. Атап айтқанда, Абай, Түркістан және Жетісу облыстарында жобалар толығымен іске асырылып, Павлодар, Ақтөбе және Батыс Қазақстан облыстарында жоба жұмыстары аяқталуда. 21 жоба пайдалануға беру мерзімінен кешіктірілуі мүмкін. Шығыс Қазақстан және Алматы облыстары мерзімінен әлдеқайда артта қалып отыр. Бұл аймақтарда 86% және 71,7% деңгейінде ең аз қаражат игерілген. Мысалы, Алматы облысында құрылысына 15 млрд теңге бөлініп, жоспарланған 12 тауарлы-сүт фермасы бойынша алты жобаның іске асыру мерзімдерінің бұзылу қаупі бар. ШҚО-да 2023 жылы қаражат бөлінген, жоспардағы 6 жобаның біреуі әлі іске асырылғаны анықталған жоқ.
