Үкімет жаңа шарттарды бекітті: енді жәрдемақыны кімдер ала алмайды?
Үкімет жәрдемақыларды тағайындау мен төлеу тәртібіне қатысты жаңа шарттарды бекітті.
Астана, NEGE. Жаңа талап бойынша азаматтарға жәрдемақының 10 түрі берілмек:
- бала туған кезде берілетін біржолғы жәрдемақы;
- бала бір жарым жасқа толғанға дейінгі күтіміне байланысты ай сайынғы жәрдемақы;
- төрт және одан көп баласы бар көпбалалы отбасыларға берілетін жәрдемақы;
- «Алтын алқа», «Күміс алқа» иегерлеріне және «Батыр ана» атағын алған көпбалалы аналарға берілетін жәрдемақы;
- мүгедектігі бойынша мемлекеттік әлеуметтік жәрдемақы;
- асыраушысынан айырылған отбасы мүшелеріне берілетін жәрдемақы;
- арнайы мемлекеттік жәрдемақы;
- бірінші топтағы мүгедектігі бар адамға күтім жасайтын адамдарға берілетін жәрдемақы;
- мүгедектігі бар баланы тәрбиелеп отырған ата-анаға, асырап алушыға немесе қамқоршыға берілетін жәрдемақы;
- арнайы кәсіптік мемлекеттік жәрдемақы.
Сондай-ақ, жаңа тізімде әлеуметтік жағдайы төмен, мұқтаж жандарға ғана берілетін жерлеуге арналған біржолғы төлем бар.
Кімдер жәрдемақы ала алмайды?
Жаңа құжат бойынша жәрдемақы тағайындау кезінде азаматтың әлеуметтік әл-ауқат деңгейі ескеріледі.
«Жоғары («А» деңгейі) және ауқатты («В» деңгейі) әлеуметтік әл-ауқат деңгейлеріне жатқызылған адамдарға жәрдемақыларды, сондай-ақ жерлеуге арналған біржолғы төлемді алу құқығы қолданылмайды», – делінген құжатта.
Еске салайық, бұған дейін мемлекеттік әлеуметтік сақтандыру қоры 13 өңірде тексеру жүргізіп, 4,4 мың адамға жәрдемақыны заңсыз тағайындау схемасын әшкерелеген болатын. Барлық өңір бойынша 38 қылмыстық іс қозғалды.