ҰҚК тыңшылық жасады деген күдікпен ұсталған өзбекстандық профессорға қатысты пікір білдірді
Қазақстанның Ұлттық қауіпсіздік комитеті Астанада тыңшылық жасады деген күдікпен қамауға алынған 46 жастағы Өзбекстан азаматы Икболжон Корабоевқа қатысты пікір білдірді.
Астана, NEGE. Ведомство мәліметінше, Өзбекстан тарабы дипломатиялық арналар арқылы ресми түрде хабардар етілген.
«Қылмыстық-процестік кодекстің 201-бабына сәйкес, сотқа дейінгі тергеп-тексеру деректері жария етуге жатпайтынын хабарлаймыз. Қазақстан Республикасының заңнамасына сәйкес, өзбекстандық тарап дипломатиялық арналар арқылы ресми түрде хабардар етілді», – делінген хабарламада.
Айта кетейік, бұған дейін BBC-дің өзбек қызметі өзбекстандық профессор Икболжон Корабоевтың Қазақстан Республикасы Қылмыстық кодексінің 176-бабы бойынша тыңшылық жасады деген күдікпен ұсталғанын хабарлаған болатын.
Икболжон Корабоев Астанада әйелімен және кәмелетке толмаған үш баласымен тұрып жатқан және Maqsut Narikbayev University-де халықаралық қатынастар пәнінен сабақ берген.
Туыстарының мәлімдеуінше, 3 шілдеде азаматтық киіммен келген бірнеше адам оған тыңшылық жасады деп айыпталғанын хабарлап, Астанадағы үйінен алып кеткен.