Түсім өсіп, пайда жоғалған. Air Astana НЕГЕ 21 млн доллар шығынға батты?

Осылайша, бір жылда қаржылық нәтиже 31,9 млн долларға нашарлаған. Бұл уақытта компанияның түсімі 16,1 пайызға өсіп, 763,9 млн долларға жетті. Бірақ жолаушылар саны 2,4 пайызға азайып, 4,39 млн адам болды.

• Тақырыпқа орай: «BAE Systems» Питер Фостермен бірге кетті. Бізді НЕГЕ қызық кезең күтіп тұр?

Air Astana бірнеше жыл бұрын тұрақты қаржылық дертке шалдыққан еді. Ол –  шығындардың кірістен жылдам өсуі. Биыл бір орындық шақырымға шаққандағы түсім 15,8 пайызға артса, дәл сол көрсеткіш бойынша шығындар 22,2 пайызға өскен.

Соның салдарынан EBITDAR 9,7 пайызға төмендеп, 141,7 млн доллар болды. Рентабельділік 23,9 пайыздан 18,6 пайызға дейін құлады. Қарапайым тілмен айтқанда, Air Astana-ның әрбір 100 доллар түсімінен бұрын 23,9 доллар қалса, қазір 18,6 доллар ғана қалып отыр.

• Тақырыпқа орай: Air Astana болашағы енді тұманды. Акционерлер НЕГЕ заттарын жинай бастады?

Қаржылық нашарлауға Pratt & Whitney қозғалтқыштарына байланысты проблема әсер еткен. Қозғалтқыштарды тексеру мен жөндеу үшін кейбір Airbus ұшақтары уақытша пайдаланудан шығарылады. Ұшақ ұшпаса да, лизинг пен техникалық қызмет көрсету шығындары тоқтамайды. Бұған шетелдік әуежайлардағы авиаотынның қымбаттауы, қосымша техникалық шығындар және теңге бағамының өзгеруі қосылған.

NEGE бұған дейін Air Astana түсімі өсіп жатқанымен, таза пайдасы азайып, міндеттемелері көбейгеніне назар аударған еді. 2025 жылдың қорытындысында компанияның түсімі 11,4 пайызға өскен. Бірақ таза пайдасы 49,4 млн доллардан 13,6 млн долларға дейін құлаған. Енді 2026 жылдың бірінші жартысында компания пайда орнына 21,2 млн доллар шығынға ұшырады.

Демек, мәселе жолаушылар санының немесе түсімнің аздығында емес. Air Astana тапқан ақшасын шығындардан қорғай алмай отыр.

Өткен жылдан бастап Air Astana жаңа бағыттар ашып, әуе паркін кеңейтіп жатыр. Бірақ қор нарығы үшін ұшақ саны емес, таза пайда маңызды. Компания енді шығындардың өсуін тоқтатып, маржаны қалпына келтіруі керек.

Әйтпесе, Air Astana-ның ұшақтары аспанда көбейгенімен, акционерлердің ақшасы жерге көміле бермек.