Тұрмыстық зорлық-зомбылық құрбандарына көмектесетін заңгер өз әйеліне зәбір көрсеткен
Жетісу облысында отбасылық-тұрмыстық зорлық-зомбылықтан зардап шеккен жандарға қолдау көрсететін орталықтың қызметкері өз әйеліне күш көрсеткені үшін жауапқа тартылды.
Астана, Nege. Оған қатысты қылмыстық іс Қаратал аудандық сотында қаралды.
«Қылмыс жасалған кезде ол отбасылық-тұрмыстық зорлық-зомбылықтан зардап шеккен адамдарға көмек көрсететін «Жанұя» отбасын қолдау орталығында заңгер болып жұмыс істеген. Алайда жәбірленушілердің құқықтарын қорғауға бағытталған кәсіби қызметіне қарамастан, өзінің жұбайына қатысты заңға қайшы әрекеттер жасаған», – деп хабарлады облыстық прокуратура.
Сот талқылауы барысында Қаратал ауданы прокуратурасының мемлекеттік айыптаушысы оның кінәсін толық дәлелдеді. Ер адам зорлық-зомбылық жасағаны үшін кінәлі деп танылды.
Сот үкімімен оған 200 сағат қоғамдық жұмыс түріндегі жаза тағайындалды. Үкім заңды күшіне енді.
Жетісулық прокурорлар тұрмыстық зорлық-зомбылыққа жол берілмейтінін және мұндай әрекеттер үшін жауапкершілік қарастырылғанын ескертеді.