Түркістанға «Жібек жолы» халықаралық пойыз бағытымен 300 турист келді
Түркістан облысында Ұлыстың ұлы күні — Наурыз мейрамы кең көлемде тойланып жатыр.
Алматы, NEGE. «Наурызнама» онкүндігі аясында ұйымдастырылған мерекелік іс-шаралар қала тұрғындары мен қонақтарына ерекше көңіл-күй сыйлауда.
Бүгін облыс орталығында «Қош келдің, әз Наурыз!» мерекелік іс-шара өтті. Салтанаттты жиынға Түркістан облысының әкімі Нұралхан Көшеров арнайы қатысып, өңір тұрғындары мен қонақтарын құттықтады.
Түркістанның ең көрікті орындарының біріне айналған «Керуен сарай» кешенінде ұлттық дәстүр мен өнерді қамтыған мазмұнды бағдарламар көпшілік назарына ұсынылды. Қолөнер шеберлері мен суретшілердің көрмесі ұйымдастырылып, келушілер қазақ халқының бай мәдениетімен танысты. Ұлттық тағамдар көрмесі арқылы салт-дәстүріміз дәріптелді. Ұлттық спорт түрлерінен жарыстар өтіп, Наурыз мейрамының айшықты дәстүрі жалғасын тапты.
Концерт барысында ұлттық аспаптарда орындалған әуендер мен халық билері, түркі халықтарының музыкалық өнері, қазақтың «Тойбастар», «Наурыз-Думан» және өзге де әндері, «Жарапазан» тұрмыс-салт жыры және дәстүрлі өнер қойылымдары қамтылған. Күй күмбірлеп, бишілер би биледі. Ондаған киіз үй тігіліп облысымызбен қатар еліміздің өзге өңірлерінен және шетелден келген саяхатшылар Түркістан төріндегі Наурыз тойына куә болды.
Олардың ішінде «Жібек жолы» халықаралық пойыз бағытымен Түркістанға келген 300-ден аса турист те бар.