Түркістандағы саммиттен кейін Тоқаев Нұралхан Көшеровке алғыс айтты
Президент Қасым-Жомарт Тоқаев Түркістандағы халықаралық саммиттің жоғары деңгейде өтуіне үлес қосқан облыс әкімі Нұралхан Көшеров пен өңір тұрғындарының еңбегін атап өтті.
Астана, NEGE. Президент Түркі мемлекеттері ұйымының Түркістанда өткен бейресми саммитінен кейін жиын өткізіп, халықаралық іс-шараны ұйымдастыруға атсалысқан облыс әкімі Нұралхан Көшеровке және өңір тұрғындарына алғыс айтты.
Мемлекет басшысы саммитке келген шетелдік қонақтар Түркістандағы жолдардың сапасын, көшелер мен саябақтардың тазалығын жоғары бағалағанын айтты. Оның сөзінше, Түркістан ірі халықаралық іс-шараларды өткізуге дайын екенін көрсетті.
Президент облыс және қала әкімдеріне көне Түркістанды дамыту мен абаттандыру жұмыстарын жалғастыруды тапсырды. Сонымен қатар саммитті ұйымдастыруға қатысқан әкімдік қызметкерлері, құқық қорғау органдары, коммуналдық сала мамандары мен еріктілер мемлекеттік наградалар және алғыс хаттармен марапатталатынын мәлімдеді.
