Түркістан облысында әкесі телефонын алып қойған оқушы қыз көпірден секірмек болды
Сауран аудандық полиция бөлімінің «102» тетігіне Шымкент-Түркістан бағытындағы көпірден жасы кәмелетке толмаған жас қыздың секіруге әрекеттеніп жатқаны жөнінде хабарлама келіп түсті, деп хабарлады Түркістан облыстық ПД баспасөз қызметі.
Алматы, NEGE. – Оқиға кешкі сағат 21:00 шамасында болған. Тәртіп сақшылары келген кезде жасөспірім қыз көпірден секіруге ыңғайланып тұрғанын көріп, райынан қайтару үшін онымен тез арада сөйлесу қажет екенін түсінді. Содан полиция инспекторлары бойжеткенді секірмеуге үгіттеп, қауіпті қадам жасамауға көндіре бастайды. Сол сәтте тәртіп сақшысының бірі қолайлы сәтті пайдаланып, бойжеткенді шапшаңдықпен ұстап қалып, қауіпсіз аумаққа алып шықты. Қырағылық пен жедел әрекеттің арқасында полицейлер осылайша 9-сынып оқушысын құтқарып қалды, - делінген хабарламада.
Белгілі болғандай, әкесі қызының ұялы телефонын тартып алғандықтан, араларында кикілжің туындап, жасөспірім ойланбастан осы қадамға барған.
