Түркістан облысында ер адам полициямен атыс кезінде қаза тапты
Түркістан облысының Мақтаарал ауданында полиция қызметкерлері патрульге оқ атқан ер адамды атып тоқтатуға мәжбүр болды.
Астана, NEGE. Жергілікті полиция департаментінің мәліметінше, жергілікті тұрғыннан оның бұрынғы жұбайы қарумен келіп, балаларының көзінше жанжал шығарғаны туралы шағым түскен.
Полиция оқиға орнына келген кезде мылтық ұстаған ер адам жүгіріп шығып, көрші үйдің ауласындағы сарайға тығылған. Бірнеше рет ескерту жасалғанына қарамастан, ол бағынудан бас тартып полицейлердің бірін жарақаттап, оқ жаудырады.
Полицейлер тойтарыс беру үшін ауаға ескерту оқтарын атқан.
Алайда құқық бұзушы ескертулерге тоқтамағаннан кейін, заңнамаға сәйкес табельдік қару қолданылды. Құқық бұзушы алған жарақатының салдарынан оқиға орнында қайтыс болды, – делінген хабарламада.
Тексеру барысында тіркелмеген шолақ мылтық, патрондар мен гильзалар тәркіленді. Аталған факті бойынша қылмыстық іс қозғалған.