Түркістан облысы: Балалар кардиохирургиясы мен медициналық ғылымның дамуы
Медицина ғылымының қоғам өміріндегі рөлі ерекше. Әсіресе, балалар денсаулығын сақтау мен оларды ауыр дерттерден емдеу мәселелері әрдайым өзекті болып қала береді. Заманауи медицина мен ғылымның жетістіктері өмір сапасын жақсартуға ғана емес, сондай-ақ жаңа буынның денсаулығын нығайтуға бағытталған. Осы тұрғыдан алғанда, Түркістан облысының балалар кардиохирургиясы саласындағы жетістіктері ерекше назар аударуға лайық.
Түркістанда Қазақстан балалар жүрегін емдеу жөніндегі мамандар қоғамының «Күннен – жүрекке: балалар кардиохирургиясы мен кардиологиясындағы коммуникациялар» атты ІІ Халықаралық конференциясының ұйымдастырылуы өңір медицинасының қарқынды дамуын және халықаралық деңгейде тәжірибе алмасу алаңына айналғанын көрсетеді. Түркістан облысында балалар кардиохирургиясы ерекше назарда. Жыл басынан бері өңірде 108 сәбидің жүрегіне ота жасалғаны осы саланың қарқынды дамып жатқанын дәлелдейді. Түркістан облыстық балалар ауруханасында туа біткен жүрек ақауы бар балаларды емдеу үшін заманауи инфрақұрылым мен кәсіби кадрлар жасақталуда.
Мысалы, ауруханада жаңа туған нәрестелерге арналған кардиореанимация бөлімшесі ашылып, күрделі оталардан кейінгі күтім жоғары деңгейде жүргізілуде. Сонымен қатар, Қызылорда мен Тараз қалаларынан жүрек ақауы бар нәрестелерді санавиация арқылы тасымалдау тәжірибесі іске асырылуда. Мұның барлығы медициналық қызметтердің қолжетімділігін арттырып қана қоймай, ауыр дертке шалдыққан балаларға екінші мүмкіндік сыйлайды.
Өңірде өтетін халықаралық медициналық жобалар, ғылыми конференциялар , ірі тәжірибе алмасулар аймақтағы саланың дамуына маңызды негіз болады. Түркістан облысында өткен аталған конференция барысында шетелдік және отандық мамандар балалар жүрек ауруларын емдеудің өзекті мәселелерін талқылап, өз тәжірибелерімен бөлісті. Ресей, Беларусия, Польша, Қырғызстан және Қазақстанның түрлі өңірлерінен келген дәрігерлер күрделі оталар жасап, бірлескен диагностика жұмыстарын жүргізді.
Еліміздің бас балалар кардиохирургі Дмитрий Горбунов пен «University Medical Center» мамандары жаңа туған нәрестелерге күрделі операциялар жасап, диагностикалық тексерулер өткізді. Сонымен қатар, ата-аналар мен жүкті әйелдерге арнап «пациент мектебі» ұйымдастырылып, жүрек ақауының алдын алу мен емдеу жолдары түсіндірілді.
Бұл конференция Түркістан облысындағы балалар кардиохирургиясының 10 жылдық даму жолына арналған маңызды шара болды. Аталған уақыт ішінде өңір медицинасы тек қана отандық емес, халықаралық деңгейде де мойындалған жоғары деңгейдегі мамандандырылған орталыққа айналды. Кардиохирургияның әрі қарай дамуы үшін тек технологиялық база ғана емес, сонымен бірге мамандардың үздіксіз біліктілігін арттыру да маңызды. Түркістан медицинасының жетістіктері еліміздің денсаулық сақтау саласының жалпы дамуына үлес қосып қана қоймай, балалар өміріне жарық сыйлауды жалғастырады. Түркістанның бұл саладағы табыстары медицинаның өңірлік дамуына, ғылымның жаңа қырларын ашуға және өмір сапасын жақсартуға бағытталған кешенді жұмыстың жарқын мысалы болып қала бермек.
Өңірде қазан айында айтулы, тың әдістердің бірімен ерекше ота жасалды. Түркістан облыстық клиникалық ауруханасында семіздікке шалдыққан науқастарға заманауи лапароскопиялық әдіспен күрделі ота жасалды. Бұл операция тек артық салмақ мәселесін шешуге ғана емес, қант диабеті, жоғары қан қысымы сияқты қосалқы аурулармен күресте де тиімді әдіс болып табылады.
Ота Литва және Астана қаласынан келген медицина мамандарының жетекшілігімен жүзеге асырылды. Литвалық профессор, медицина ғылымдарының докторы Алмантас Малецкас бұл тәжірибені Қазақстандағы семіздік мәселесімен күрестегі маңызды қадам деп атап өтті. «Біз марафон аясында Алматы және Астана қалаларында осындай оталарды жасап, жергілікті дәрігерлерге өз тәжірибемізбен бөлістік. Түркістан облыстық клиникалық ауруханасымен іскерлік байланысты нығайту арқылы мұндағы әріптестеріміздің біліктілігін арттыруды мақсат еттік. Бұл шеберлік сыныбы жергілікті мамандардың енді өз бетімен күрделі операцияларды жасауға дайын екендігін көрсетеді», – деді профессор.
Лапароскопиялық әдіс – семіздікке шалдыққан және дәрілік ем көмектеспеген қант диабетімен ауыратын науқастарға арналған тиімді шешім. Себебі артық салмақ тек эстетикалық мәселе емес, сонымен бірге жүрек-қан тамырлары, буындар мен басқа да жүйелерге қосымша жүктеме түсіріп, өмір сапасын төмендетеді.
Операцияға қатысқан жергілікті дәрігерлер үшін бұл тәжірибе өз шеберліктерін арттыруға мүмкіндік берді. Мұндай халықаралық ынтымақтастық өңірдегі медициналық қызмет сапасын жаңа деңгейге көтеруге ықпал етеді. Айта кетейік, шетелдік дәрігерлер алдағы уақытта Ташкент қаласында осы әдісті қолдана отырып, өз тәжірибелерімен бөлісуді жалғастырады. Аталған тәжірибе Түркістан облысында медицина ғылымының қарқынды дамуының, сондай-ақ халықаралық тәжірибені қолданудың жарқын мысалы болды.
Медицина ғылымын дамыту өңірлердің әлеуметтік және экономикалық дамуы үшін маңызды рөл атқарады. Әсіресе, Түркістан облысы сияқты қарқынды дамып келе жатқан аймақтарда бұл сала халықтың өмір сапасын жақсартудың негізгі бағыттарының бірі болып табылады. Денсаулық сақтау жүйесінің күшеюі тұрғындардың өмір жасын ұзарту, бала өлімін азайту, сондай-ақ созылмалы аурулардың алдын алу секілді маңызды нәтижелерге қол жеткізуге мүмкіндік береді.
Өңірлерде медициналық ғылымның дамуы мамандардың біліктілігін арттырумен, заманауи технологиялар мен әдістерді енгізумен тікелей байланысты. Мысалы, Түркістан облысында балалар кардиохирургиясының дамуы – осының айқын дәлелі. Мамандардың біліктілігі жоғары деңгейге көтерілген сайын, өңір тұрғындары үшін сапалы медициналық көмек қолжетімді бола түседі. Мұндай қызметтер тек әлеуметтік саланың жақсаруына ғана емес, жалпы экономиканың да дамуына әсер етеді.
Сонымен қатар, өңірлердегі медициналық инфрақұрылымның нығаюы азаматтардың денсаулығын сақтауға және өмір сапасын арттыруға мүмкіндік береді. Бұл жергілікті халықтың еңбекке қабілеттілігін сақтау мен өнімділігін арттыруға ықпал етеді. Сонымен қатар, медициналық орталықтардың жоғары деңгейдегі қызмет көрсетуі сырттан келетін пациенттердің санын арттырып, медициналық туризмді дамытуға да жағдай жасайды.
Медицинаның дамуы әлеуметтік мәселелерді шешуге де көмектеседі. Заманауи диагностикалық және емдеу әдістерін енгізу нәтижесінде денсаулық сақтау қызметтері әртүрлі әлеуметтік топтарға қолжетімді бола алады. Бұл теңсіздікті азайтып, өңірдегі тұрақтылықты нығайтады. Түркістан облысындағы медициналық жетістіктер өңірдің ғана емес, бүкіл елдің денсаулық сақтау жүйесінің дамуындағы оң өзгерістердің үлгісі бола алады.
