28 Тамыз 13:18
Түркияда Әзірбайжан президентінің бұрынғы оққағары өлі күйінде табылды
Әзірбайжан президенті Ильхам Әлиевтің бұрынғы оққағары Махир Мамедов Түркияның батысындағы Айдын қаласында орналасқан Кушадасы курорттық аймағындағы қонақүйде өлі күйінде табылды.
Алматы, NEGE. Өлімнің нақты себебі әлі анықталған жоқ. Бұрынғы оққағар Махир Мамедов 50 жасында қайтыс болды.
Махир Мамедов отбасымен Түркияға үш күн бұрын демалысқа келген. Олар бес жұлдызды қонақүйге орналасады. Сол жерде Мамедовтың мәйітін сырттан серуендеп, баласымен бірге бөлмеге оралған әйелі тауып алған. Оқиға орнына келген жедел жәрдем қызметкерлері ер адамның қайтыс болғанын анықтады.
Өлімнің себебі сараптамадан кейін белгілі болады. Қазіргі уақытта тергеу амалдары басталды.
Түрік ақпарат құралдары Махир Мамедовтың «біраз уақыт» Илхам Әлиевтің жеке күзетшісі болғанын айтады.
