Түркия елшісі Anadolu басылымындағы сұхбатында қазақ халқының апаттан кейінгі көмегін атап өтті
Түркияның Қазақстандағы елшісі Уфук Экижи Anadolu басылымына берген сұхбатында Кахраманмараштағы табиғи апаттан кейін қазақ халқының Түркияға көмек қолын созғанын атап өтті.
Алматы, NEGE. «Қазақстан Президенті Қасым-Жомарт Тоқаев түрік әріптесі Режеп Тайып Ердоғанға телефон соғып, барлық көмекті жіберуге дайын екенін мәлімдеді. Апат болғаннан кейінгі екінші күні бірінші іздеу-құтқару бригадасы, ал екі күннен кейін 60 адамнан тұратын екінші брикада Түркияға аттанды», - деді Экижи.
Сонымен қатар, дипломаттың айтуынша, Қазақстан Түркияға 1 миллион доллар көлемінде қаржылай көмек көрсетті, сондай-ақ жылжымалы дәретханалар, шатырлар, көрпе-төсеніштер мен қысқы киімдер тиелген 55 тонналық гуманитарлық жүк жіберді.
Елші Қазақстанның қарапайым азаматтары 4,1 миллион доллардан астам қайырымдылық жинағанын тілге тиек етті. Барлық қайырымдылық AFAD шотына аударылған.
