Түркістан тұрғыны есірткі сатты деген күдікпен ұсталды
Түркістан тұрғыны есірткі сатты деген күдікпен ұсталды, – деп хабарлады Polisia.kz
Алматы, NEGE. Түркістан облысы ПД Есірткі қылмысына қарсы іс-қимыл басқармасына жергілікті тұрғыннан хабарлама келіп түскен.
Онда Түркістан қаласының тұрғыны есірткі затын сатумен айналысып жүргені айтылған. Ақпарат алысымен Түркістан облысы ПД ЕҚҚІҚБ-ның қызметкерлері қылмысты ашудағы өзіндік әдістерді қолданып, қажетті шараларды атқарды. Соның нәтижесінде күдікті ер адам анықталып, ұсталды.
Күдіктінің үйіне тінту жүргізу кезінде оның сарайындағы кір жуғыш машинадан есірткі қолдануға арналған құрылғы, сандығының ішінен бір қағазға оралған және жатын бөлмесіндегі матрас астынан ішінде есірткіге ұқсас заты бар екі сіріңке қорабы алынды. Сараптама қорытындысымен алынған зат жалпы салмағы 15 грамға жуық кептірілген марихуана болып шықты. Ол есірткі затын сатумен айналысты деген күдікке ілініп отыр.
Қазіргі уақытта аталған жайт бойынша сотқа дейінгі тергеу амалдары ҚР ҚК-нің 297-бабы (Есірткі құралдарын, психотроптық заттарды, сол тектестерді өткізу мақсатында заңсыз дайындау, қайта өңдеу, сатып алу, сақтау, тасымалдау, жөнелту немесе өткізу) бойынша жүргізілуде. Тергеу оқиғаның толық мән-жайын анықтайтын болады. Ер адам қамауға алынды. Қазіргі уақытта полицейлер күдіктінің есірткіні сақтау мен өткізудің басқа да деректеріне қатысы бар-жоғын анықтауда.