Түркістан облысының денсаулық сақтау саласы ардагерлеріне құрмет көрсетілді
Республика күніне орай, Түркістан облысында денсаулық сақтау саласы ардагерлеріне құрмет көрсетілді, деп хабарлайды ҚазАқпарат.
Түркістан, NEGE. Атап айтқанда, облыс әкімінің орынбасары Арман Сабитовтың қатысуымен Денсаулық сақтау министрлігінің ведомстволық наградаларын табыстау рәсімі өтті. Ақ желеңді абзал жандар «Еңбек ардагері» және «Денсаулық сақтау ісіне қосқан үлесі үшін» төсбелгілерімен марапатталды.
Түркістан облыстық қоғамдық денсаулық басқармасының басшысы Марат Пашимов өз кезегінде медицина саласын жақсарту мақсатында еңбек етіп жүрген қызметкерлерге «Денсаулық сақтау ісінің үздігі» төсбелгісін тапсырды.
Жалпы, 2021 жылы Түркістан облысында мемлекеттік-жекеменшік әріптестік бағдарламасы шеңберінде 4 фельдшерлік-акушерлік пункт салынып, ауыл тұрғындарына пайдалануға берілді. Биыл тағы да 4 фельдшерлік пункт құрылысы жүргізіліп жатыр.
Сонымен қатар, ауылдық жерлерде және шалғай елді мекендерде тұратын халыққа консультациялық-диагностикалық қызметтер көрсету үшін барлық қажетті құрал-жабдықтармен жабдықталған жылжымалы медициналық кешендер жолға шығарылды.
2021 жылы 2 809 медицина қызметкері біліктілігін арттырды, оның ішінде 109 қызметкер АҚШ, Түркия, Ресей елдерінде білімдерін жетілдірді. Осы жұмыстар биыл да жалғасын тауып жатыр. 2022 жылдың 9 айында 1 223 медицина қызметкері біліктілігін арттырды, сондай-ақ Түркия еліне оқуға жіберу жоспарланып отыр. 2023 жылы 4 аудандық аурухананы (Сайрам, Ордабасы, Сарыағаш, Жетісай) көпбейінді аудандық аурухана етіп қайта құру көзделген.
