«Тұрғымбаевтың үстінен қылмыстық іс қозғау мәселесі шешілді»
Кеше Мемлекет басшысы Қасым-Жомарт Тоқаевтың өкімімен Ерлан Тұрғымбаев Президенттің кеңесшісі лауазымынан босатылды. Ал бүгін сенімді ақпарат көзі «Тұрғымбаевтың үстінен қылмыстық іс қозғау мәселесі шешілгенін» мәлімдеді.
Полиция генерал-лейтенанты Е.Тұрғымбаев кеңесшіліктен кетерден төрт күн бұрын ғана «Нурсултанский соловей» телеграм-каналы бүй деп жазған: «ҰҚК-нің бұрынғы төрағасы К.Мәсімовке қатысты жүргізілген тергеудің нәтижесі бойынша ІІМ-нің бұрынғы басшысы Ерлан Тұрғымбаевқа «Қаңтар бүлігіне» қатысты айып тағу мәселесі шешіліп жатыр».
Фото: ТАСС
Сондай-ақ, телеграм-канал бүлік болған күндері Мәсімовтің Тұрғымбаевты әрекетсіздікке итермелегенін, «Алматыға шабуыл жасаған 20 мың террорист» туралы президентке Тұрғымбаевтың айтқанын, оны Мәсімовтің растағанын жазған. Бұдан бөлек, Мәсімов пен Тұрғымбаев Елордаға шабуыл жасалуы мүмкін екенін жеткізіп, мемлекет басшысын Ақордадан кетіп қалуға үгіттеген-міс.
Мемлекет басшысы Қаңтар бүлігіне қатысты кезекті бір сұхбатында өзін «кейбір азаматтардың самолетпен немесе вертолетпен Ақордадан кетіп қалуға үгіттегенін» айтқаны рас. Бірақ бұлардың арасында Тұрғымбаев болды ма, жоқ па, ол жағы әзірге белгісіз.
Фото: ғаламтордан
Тұрақты оқырманымыздың айтуына қарағанда, Тұрғымбаевқа қатысты қылмыстық іс қозғау мәселесі түбегейлі шешілді, енді оған Қаңтар бүлігі кезіндегі әрекетсіздіктен бөлек, бейбіт халыққа оқ ату және азаптау бойынша айыптар тағылуы мүмкін.
