Трамп жақын арада Макронның Франция президенті қызметінен кететінін айтты

Астана, NEGE. 14 наурызда Дональд Трамп бірнеше елден, соның ішінде Франциядан теңіз жолының қауіпсіздігін бірлесіп қамтамасыз ету үшін Ормуз бұғазына әскери кемелерін жіберуді сұраған болатын.

17 наурызда Эммануэль Макрон аймақта белсенді әскери операциялар жүріп жатқанда Париж Ормуз бұғазын қорғау операциясына қосылмайтынын мәлімдеді. Сондай-ақ ол жағдай тұрақталғаннан кейін Франция тарабы кемелерді алып жүруге қатысатынын атап өтті.

БАҚ өкілдері Дональд Трамптан Макронның осы мәлімдемесіне пікір білдіруді сұрады.

«Ол жақын арада қызметінен кетеді, сондықтан уақыт көрсетеді», – деп жауап берді Трамп бұл сұраққа.

Еске сала кетейік, АҚШ пен Израильдің Ирандағы әскери операциясынан кейін Тегеран Ормуз бұғазы арқылы өтетін кеме қатынасын жауып тастады. Бұғаз арқылы жүк тасымалдау жолының жабылуы мұнай бағасының күрт өсуіне әкеп соқтырды.