Трамп $100 млн қайырымдылық қаржысының жоғалуына наразы
АҚШ президенті Дональд Трамп Лос-Анджелестегі өрттен зардап шеккендерге арналған қайырымдылық шарасында жиналған 100 миллион доллардың жоғалғанын мәлімдеді.
АЛМАТЫ, NEGE. Бұл туралы ол Truth Social желісінде жазды.
— «100 миллион доллар жоқ болды. Бұл қаржы Лос-Анджелестегі өрт құрбандарына көмекке жұмсалуы тиіс еді. Егер дұрыс басқару болса, бұл өрттер мүлдем болмас еді. Губернатор Ньюсом Солтүстік Калифорния мен Тынық мұхитының солтүстік-батысынан миллиардтаған галлон суды босатудан бас тартты. Бұның бәрін қалай өзгертуге болар еді!» — деп жазды Трамп.
Президент FireAid атты қайырымдылық концертін меңзеді. Бұл іс-шара Лос-Анджелесте 2025 жылдың қаңтарында болған алапат орман өртінен баспанасынан айырылған адамдарға көмек жинау үшін ұйымдастырылған еді. Концерт барысында шамамен 100 млн доллар жиналып, оған Оливия Родриго, Кэти Перри және Леди Гага секілді әлемдік жұлдыздар қатысты.
Еске салайық, 2025 жылдың қаңтарында Лос-Анджелес маңында болған ірі өрттер салдарынан 100 мыңнан астам адам эвакуацияланып, бірнеше адам қаза тапты. Мыңнан астам ғимарат, соның ішінде америкалық танымал тұлғалардың үйлері де жанып кеткен.