Төлеутай Рақымбеков «Ауыл» партиясынан шықты
2019 жылы президенттікке үміткер болған «Ауыл» партиясы төрағасының экс-бірінші орынбасары Төлеутай Рақымбеков партия қатарынан шыққанын мәлімдеді.
Астана, NEGE. Рақымбековтің айтуынша, оның қоғамдық-саяси қызметі 2015 жылдың қыркүйегінен бері «Ауыл» партиясымен тығыз байланысты болған. Осы уақыт ішінде ол партия президиумы мен саяси кеңесінің мүшесі болып, бес жылдан астам уақыт төрағаның бірінші орынбасары қызметін атқарған.
Сондай-ақ партия оны 2019 жылғы президент сайлауына, ал 2021 және 2023 жылдары Мәжіліс депутаттығына кандидат ретінде ұсынған.
Саясаткер бұл шешімді ұзақ ойланғаннан кейін қабылдағанын айтып, партиядан шығу туралы өтінішін 4 мамыр күні тапсырғанын Facebook парақшасында жазды.
Еске салайық, 2022 жылы Рақымбеков асырап алған қызы тарапынан айтылған айыптаулардан кейін қоғам талқысына түскен еді. Алайда ол бұл мәлімдемелерді жоққа шығарған.
